قوبادی جەلیزادە: ئەگەر كەسێك شیعرەكانم بخوێنێتەوە، وادەزانێت بەلەشكرێك ژن دەورەدراوم

قوبادی جەلیزادە: ئەگەر كەسێك شیعرەكانم بخوێنێتەوە، وادەزانێت بەلەشكرێك ژن دەورەدراوم

قوبادی جەلیزادە: ئەگەر كەسێك شیعرەكانم بخوێنێتەوە، وادەزانێت بەلەشكرێك ژن دەورەدراوم

سازدانی: نزار جەزا
قوبادی جەلیزادە، كە بەسەرقافڵەی شیعری ئیرۆتیكی كوردی دادەنرێت، باسلەژیانی ڕاستی خۆی بەراورد بە شیعرەكانی دەكات‌و ڕایدەگەیەنێت، ئەگەر كەسێك شیعرەكانی بخوێنێتەوە وادەزانێت دەورەدراوە بەلەشكرێك ژن، بەڵام بەوجۆرە نییە.

ئەم شاعیرەی كورد لەم چاوپێكەوتنەیدا لەگەڵ (خەڵك) باسلەوەدەكات، لەوەتەی قسە لەسەر ئیرۆتیك دەكات، شەڕی بۆ هاتووە، هەندێكجار لەڕێگەی گروپە ئیسلامییەكانەوە بووە، هەندێكجار تەنانەت لەناو خێزانەكەی خۆیەوە بووە.

جەلیزادە ژنی كردۆتە سەنتەری شیعرەكانی، لەم چاوپێكەوتنە تایبەتەیدا، هۆكارەكەی ڕووندەكاتەوە و دەڵێت"ژن لای من ڕەنگی ژیانە، سەمفۆنیایە، مۆسیقایە، جوانییە، ڕەنگە، هەموو شتەكانی جوانییە، وا سەیری ژن دەكەم مانگ و گوڵ و پەپولە كۆپییەكی كاڵی ژنبن".

"دوای دابڕانم، بەتەواوی گەڕامەوە ناو خودی خۆم و چومە ناو ژیانی شیعر و ئەدەب و بەجدی بومە هاوڕێی كتێب"

خەڵك: ماوەی چەند ساڵێكە زۆر كەم دەردەكەویت هەم لەناو هاوڕێیانت هەم كۆڕی شیعری ئەنجامنادەیت، هەم لەمیدیاكانیش نابینرێیت، هۆكاری ئەم دابڕانەت چییە؟
قوبادی جەلیزادە: هۆكارەكەی دەگەڕێتەوە بۆ زۆر هۆكار، بەڵام لەسەروو هەمویانەوە، مەرگی هاوڕێی تەمەنم(محەمەد موكری) لەساڵی 2012 وای لێكردم هەموو بەریەككەوتنێكم لەدەرەوەی خۆم ببڕم و ئەو پەردەیەم دادایەوە كە دەرەوەی خۆمم لێوە دەبینی، بۆیە كتێبخانەكەمم هەڵبژارد و زیاتر بومە دۆستی كتێب، بەڵام لەئێستادا ئەو پەردەیەم لاداوە و دەرەوەی خۆم دەبینم، كە هێشتا مرۆڤی جوان ماون و ژیان هەر بەردەوامە.
هۆكارێكی دیكەی دابڕانم دەگەڕێتەوە بۆ ئەو بارە ئابووریەی كە هەرێمی كوردستانی گرتۆتەوە، چونكە من دانیشتنی شەوانی سەر مێزم زۆر بوو، هاوڕێیان دەعوەتیان دەكردم، دەعوەتم دەكردن، بۆیە بەگیرفانی بەتاڵەوە چونە ناو باڕ یان هەر شوێنێكی تر ئەستەمە.
هاوكات ئەو بارە نالەبارەی كە پێشتر سەرۆكی دادگای نەوجەوانان بووم، هەستم كرد دادوەریش ئەو جوانیەی جارانی نەماوە، هەر بۆیەش خۆم خانەنشین كرد و ئەو مەجالەم جێهێشت.


خەڵك: ئەو ماوەیەی دابڕابوویت، بەردەوامبوویت لە شیعر نوسین یاخود لەشیعریش تۆرابوویت؟
قوبادی جەلیزادە: من لەشیعر نوسین هەر بەردەوامبووم، بەڵام لەدوای كۆچی محەمەد موكرییەوە، كۆڕی شیعریم نەكردووە، تاوەكو ئەم ماوەیەی ڕابردوو، كە كۆڕێكم لەهۆڵی جەمال عیرفان ئەنجامدا.

خەڵك: لەگەڵ ئەوەی مەرگی محەمەد موكری كاریگەری لەسەر دابڕانت دروستكرد، ئایا ئەم دابڕانەت یان مەرگی موكری چ سودێكی بە تۆ بەخشی؟
قوبادی جەلیزادە: دوای دابڕانم، بەتەواوی گەڕامەوە ناو خودی خۆم و چومە ناو ژیانی شیعر و ئەدەب و بەجدی بومە هاوڕێی كتێب، واتە منی توشی گۆشەگیری كرد، بەڵام ڕووناكیشی پێبەخشیم، لەئەنجامیشدا زۆر سودم وەرگرت، بەنمونە سێ كۆمەڵە شیعرم چاپكرد، ئێستاش كۆمەڵە شیعری چوارەمم ئامادەیە.

خەڵك: ئەو كۆمەڵە شیعرەی باستكرد، ناوی چییە و بۆچی تائێستا چاپنەكراوە؟
قوبادی جەلیزادە: ئەو كۆمەڵە شیعرەم بەناوی"كۆڵانە شینەكانی منداڵی"یەوەیە و هۆكاری چاپنەكردنیشی دەگەڕێتەوە بۆ گیرفان بەتاڵی خۆم  و  گیرفان بەتاڵی دەزگاكانی چاپ و بڵاوكردنەوە.

خەڵك: تاكو ئێستا چەند بەرهەمت بەچاپ و بڵاوكردنەوە گەیاندووە؟
قوبادی جەلیزادە: تاكوئێستا یانزە كۆمەڵە شیعرم بەچاپگەیاندووە.


"مانگ و گوڵ و پەپولە كۆپییەكی كاڵی ژنن"

خەڵك: لەشیعرەكانتا بەتایبەت شیعرە ئەویندارییەكانت زۆر باش وێنای ئافرەت دەبینرێت، و بەشێك لەخوێنەری شیعرەكانیشت باسلەوەدەكەن زۆر جوانتر لەشاعیرانی دیكە وێنای ئافرەت ئەنەخشێنی، چی شتێك لەپشت ئەو جوان نوسییەوە هەیە؟
قوبادی جەلیزادە: ژن لای من ڕەنگی ژیانە، ژن سەمفۆنیایە، ژن مۆسیقایە، ژن جوانییە، ژن ڕەنگە، ژن هەموو شتەكانی جوانییە، من وا سەیری ژن دەكەم مانگ و گوڵ و پەپولە كۆپییەكی كاڵی ژنبن، لەبنەڕەتدا مانگ ژنە، گوڵ ژنە، پەپولە ژنە، ئەمانە وای كرد، ژن بكەمە سەنتەری ئیشەكانم، نەك هەر جوانی و ئەوینیش، تەنانەت ئیشكردن لەسەر جەستە و ئیرۆتیكا، كە بەر لەمن ڕەنگە گۆرانی شاعیر قسەی لەسەر ژن كردبێت، بەڵام بەشەرمەوە قسەی لەسەر جەستە كردووە، من ئەوەم تێپەڕاند و گەڕامەوە بۆ ئەو میراتە فۆلكلۆرییەی كورد هەیەتی، من ئەگەر كورد نەبومایە سەیر ئەبوو لەسەر ئیرۆتیك قسە بكەم، بەڵام كە لەمیراتی فۆلكلۆری كورد دەڕوانیت هەمووی ئیرۆتیكە، هەمووی قسەكردنە لەسەر جوانی، واتە من شتێكم نەكردووە لە كلتوری كوردیدا غەریب بێت، ڕەنگە بۆ عەرەبێك یان شاعیرێكی ئینگلیز یان ژاپۆنی غەریب بێت، بەڵام فۆلكلۆری ئێمە سەرتاپای جەستەیە و جوانی و ئیرۆتیكە.

"ئەوەندەی لە شیعردا ژندۆستم و پەیوەندی قوڵم لەگەڵ ژندا هەیە، لەژیانی ڕاستیدا ئەوە نیم"

 
خەڵك: لەژیانی ڕاستیتدا پەیوەندیت لەگەڵ ژناندا چۆنە؟ 
قوبادی جەلیزادە: ئەوەی لەشیعرەكانمدا دەینوسم ناتوانم بڵێم ژیانی منە، ڕەنگە بەشێكی زۆری تەنها لەخەیاڵدا بێت، ئەگەر كەسێك شیعرەكانم بخوێنێتەوە وادەزانێت كەسێكی زۆر قەرەباڵغم و دەورەدراوم بەلەشكرێك ژن، بەڵام بەوجۆرە نییە، ڕەنگە لەهەموو ئەو ژنانەدا یەك كەس هەبێت جێگەی بایەخی من بێت، ڕەنگە هاوسەرەكەمبێت، ڕەنگە دراوسێكەمبێت، ڕەنگە ژنێكی سەر بالكۆنەی شوقەكەی بەرامبەرمان بێت، وەك شاعیر ئەوەندەی لە شیعردا ژندۆستم و پەیوەندی قوڵم لەگەڵ ژندا هەیە، لەژیانی ڕاستیدا ئەوە نیم، مەبەستم ئەوە نییە خۆم لەگۆشەیەك قەتیس بكەم، بەڵام ئەو هەموو حەز و جوانیەی كۆمكردۆتەوە ڕەنگە لەیەك ژنی تایبەتدا بیبینم، من لەگەڵ زۆری و بۆریدا نیم، قەت بایەخم بەژمارە نەداوە، كە چەند ژنم لەگەڵدایە؟ بەڵكو چ جۆرە ژنێك لەگەڵمدایە؟ ئەوە گرنگە، واتە ژمارە گرنگ نییە، بەڵكو جۆر گرنگە.

خەڵك: بەهۆی ئەوەی تۆ بە سەرقافڵەی شیعری ئیرۆتیكی كوردی دادەنرێیت، لەماوەی ساڵانی ڕابردوودا لەلایەن بەشێك لەكۆمەڵگە و ئیسلامییە  توندڕۆكانەوە كێشەت بۆ  دروستكرا و هەندێك هەڕەشەت لەسەربوو، ئەو كێشانە چین بەهۆی شیعرەكانتەوە بۆت دروستبوون و ئێستا ئەو هەڕەشانە بەردەوامییان هەیە؟
قوبادی جەلیزادە: لەوەتەی قسە لەسەر ئیرۆتیك دەكەم، شەڕم بۆ هاتووە، هەندێكجار لەڕێگەی گروپە ئیسلامییەكانەوە بووە، هەندێكجار تەنانەت لەناو خێزانەكەی خۆمەوە بووە، ڕەنگە خێزانەكەشم هێندە پێی خۆشنەبێت باسی ئیرۆتیك بكەم، بۆیە شەڕی من بەردەوامە لەگەڵ بەرامبەرەكانم، تائێستاش كۆتایی نەهاتووە، بەتایبەت لەتۆڕە كۆمەڵایەتییەكانەوە ئیستغلالی ئەوە دەكەن و بەناوی نەناسراوەوە جنێو دەدەن و هەڕەشەش دەكەن، تەنانەت لەسەر نوسینی هەندێك شیعرم لەدیوانی"ستیانی بەفر پڕە لەڕیشۆڵە" چەند مامۆستایەكی ئایینی لەوتاری ڕۆژی هەینیدا تەكفریان كردم، پاشان درام بەدادگا، ئەو كۆمەڵە شیعرەشم تاكو ئێستا دەستبەسەركراوە، بەڵام خۆم بەر لێبوردنێكی گشتی كەوتم، ئەگەرنا لەوانەیە سزابدرامایە.

خەڵك:شیعری ئیرۆتیك چی شتێكی لەژیانی تۆ سەندەوە؟
قوبادی جەلیزادە: لەبەرئەوەی سەرقافڵەی شاعیری كوردی ئیرۆتیكنوسم، هیچی لێ نەسەندوم، ئەو شەرەفە بۆ من بەسە، كە باسی شیعری ئیرۆتیك دەكرێت، ناوی قوبادی جەلیزادە لەپێشەوە دێت، ئەو تەشقەڵە و شەڕانەش كۆتایی دێت، بەڵام شیعری ئیرۆتیك بۆ مێژوو دەمێنێتەوە، ئەمەش شەرەفێكی گەورەیە.

"هەندێك شیعرم لەدیوانی (ستیانی بەفر پڕە لەڕیشۆڵە) تاكو ئێستا دەستبەسەركراون"


خەڵك: لەدوای تۆوە شاعیرانی دیكەی كورد، توانییان لەسەر ڕێچكەی تۆ بڕۆن؟
قوبادی جەلیزادە: من ناڵێم قوتابخانەم، چونكە ئەوە سەختە، بەڵام دەزانم گەنجەكان زۆرن كە شوێنپێی من هەڵدەگرن، تەنانەت زۆر قەسیدە دەخوێنمەوە بۆنی منی لێ دێت، دڵخۆشم بەوەی لەشكرێك گەنج، ناڵێم دوامكەوتون، ڕەنگە لەتەنیشتم بن، بۆیە لەساحەكەدا تەنها نیم، بەتایبەت لەڕێگەی تۆڕی كۆمەڵایەتی فەیسبوكەوە شیعرەكانم دەخوێننەوە و ڕەنگە لاساییشم بكەنەوە، ئەو ڕەنگەی ڕشتومە خەڵك دێت بۆنی پێوە دەكەن.

خەڵك: ئەو كەشەی ئێستا لەكوردستان هەیە، تاچەند گونجاوە بۆ نوسینی شیعر بەراورد بەساڵانی ڕابردوو؟
قوبادی جەلیزادە: باری ئابووری ئەگەر بتوانێت هەموو شتێك سەروبن بكات، ناتوانێت شیعر سەروبن بكات و شیعر وەك خۆی دەمێنێتەوە، شیعر زەمینەی تایبەتی خۆی هەیە، نیشتیمانی تایبەتی بۆ گەشەكردن هەیە، بەنمونە وڵاتی ژاپۆن لەڕیزی پێشەوەی وڵاتانی پیشەسازییەوەیە، بەڵام شیعری هایكۆ(كورتیلە شیعر) لەسەر دیوار و مێز و قاپەكانیش بونی هەیە، تەنانەت هەندێك لەژنانی ژاپۆن شیعری هایكۆ لەسەر جلی ژێرەوەیان دەنوسن، كەواتە  شیعر مەسەلەیەكی ڕوحی و ویژدانییە، نە ئابوری قورس نە پیشەسازی نە تەكنەلۆجیا ناتوانێت شیعر لەناوبەرێت، بۆیە شیعر ڕوبارێكی ئەزەلییە بەردەوام هاژە دەكات.

خەڵك: كەواتە ئەو كەشەی ئێستا بەراورد بەساڵانی ڕابردوو جیاوازی بۆت دروستنەكردووە؟
قوبادی جەلیزادە: من گیرفانم بەتاڵە بەڵام زیهن و فكر و ڕوحیەتم پڕە لەشیعری جوان.

خەڵك: چی قسەیەكت بۆ شاعیرە تازەكانی ئێستا هەیە، ئایا هیچ ئامۆژگارییەكت بۆ ئەوان هەیە؟
قوبادی جەلیزادە: من بەكفری دەزانم ئامۆژگاری شاعیرێكی گەنج بكەم، چۆن شیعر بنوسێت، چونكە زەمەنێك من و ئەو گەنجە لەیەكتر دووردەخاتەوە، ئەو گەنجە بیركردنەوە و زیهنیەتی زۆر لەمن جیاوازە، لەبەرئەوە هەرگیز ناتوانم شاعیرێك ببەستمەوە بەخۆمەوە و بڵێم تكایە وەك من بیربكرەوە، چونكە گۆران وەك جیلی پێش خۆی بیرینەكردەوە و ئامۆژگاری نالی و مەحوی و ئەوانەی وەرنەگرت، بەجۆرێك شیعری تازە كردەوە، دوای گۆرانیش خەڵك هات و گۆرانی تێپەڕاند، دەكرێت ئێستاش خەڵك بێت و من تێپەڕێنێت، بۆیە هەرگیز ناتوانم گەنجێك بەبزمارێكدا داكوتم و بڵێم وەك قوبادبە، ئەو ئازادە چۆن دەنوسێت، دەبێت خۆی بزانێت چۆن دەنوسێت، ئەمڕۆ ئینتەرنێت دنیای فراوانی بەڕووی شاعیراندا كردۆتەوە، بەنمونە دەتوانن لەڕێی ئینتەرنێتەوە دوا قەسیدەی دوورترین شاعیر ببینیت، كەواتە ئامۆژگاری خوێندنەوە و كتێب و بەدواداچونە.


خەڵك: تاچەند گرنگە نوسەران ستایلێكی جیاوازی جلوبەرگ و ڕوخساریان هەبێت، بەوپێیەی ستایلی جلوبەرگ و قژت جیاواز دەبینرێت؟
قوبادی جەلیزادە: شاعیر و نوسەر نابێت لەستایل و نوسیندا دووبارەبێت، بەڵكو دەبێت لەستایلی قژ و چاكەت و پێڵاو و جلوبەرگ و تەنانەت هەڵسوكەوتیشدا خۆی جیابكاتەوە و جیاوازتر جوڵە بكات، بەنمونە كاتێك بەسەر شەقامێكدا تێپەڕی خەڵك بزانێت تۆ شاعیری یان هونەرمەندی یان نوسەری، هەر ئەوە گرنگ نییە، كە لەناخەوە چیت هەیە و چی دەنوسی، بەڵكو دەبێت ستایلیشت جیاوازبێت.


15/02/2018
2782 جار بینراوە‌‌


Developed by Avesta Group and powered by Microsoft Azure

Copyright © 2016 Xelk. all rights reserved

نوێ

نەشئەت ئەکرەم لەکوێیە؟