خه‌ڵک
هه‌ردوو ده‌سته‌ی پزیشکی هه‌ڵبژارده‌کانی میسڕ و ئیسپانیا ڕێگه‌یان به‌ موحه‌مه‌د سه‌لاح و دانی کارڤاخال دا به‌شداری مۆندیالی ٢٠١٨ی ڕوسیا بکه‌ن.

ڕۆژنامه‌کانی "مارکا و زه‌ سه‌ن" ئاشکرایان کردووه‌، ده‌سته‌ی پزیشکی هه‌ڵبژارده‌کانی میسڕ و ئیسپانیا دوای ئه‌نجامدانی پشکنینی پزیشکی ورد بۆ دوو پێکراوی یاریی کۆتایی خولی یانه‌ پاڵه‌وانه‌کان "سه‌ڵاح و کارڤاخال"، بۆیان ده‌رده‌که‌وتووه‌ که‌ پێکانه‌کان زۆر قورس نین و هه‌ردوو ناوبراو ده‌توانن به‌شداری چالاکیه‌کانی مۆندیال بکه‌ن.

موحه‌مه‌د سه‌ڵاح: به‌پێی پشکنینه‌کان ده‌رکه‌وتووه‌ که‌ ئێسکی شانی نه‌ شکاوه‌ و نه‌ ده‌رچووه‌، به‌ڵکو دووچاری ڕوشانی جومگه‌یی هاتووه‌ و ئه‌و جۆره‌ پێکانه‌ش پێویستی به‌ دوو هه‌فته‌ حه‌وانه‌وه‌ و چاره‌سه‌ر ده‌بێت، ده‌سته‌ی هه‌ڵبژارده‌ی میسر له‌و واده‌یه‌دا ئاماده‌کاریه‌کان ئه‌نجام ده‌ده‌ن و به‌هۆیه‌وه‌ یاریزانه‌ ناوداره‌که‌ی لیڤه‌رپوڵ چه‌ند ڕۆژێک له‌ ئاماده‌کارییه‌ جه‌سته‌ییه‌کان دواده‌که‌وێت، ئه‌وه‌ش واده‌کات ڕووبه‌ڕوبونه‌وه‌ی یه‌که‌م به‌رامبه‌ر ئۆرۆگوای له‌ده‌ست بدات.

دانی کارڤاخال: دوای پشکنینه‌ پزیشکیه‌کان ده‌رکه‌وتووه‌ که‌ دووچاری بچڕانی به‌سته‌رێکی قاچی ڕاستی هاتووه‌ و به‌هۆیه‌وه‌ ماوه‌ی دوو تا سێ هه‌فته‌ له‌یارییکردن داده‌بڕێت، به‌م هۆیه‌وه‌‌ جولیان لوپێتیگی ڕاهێنه‌ری ئیسپانیا بڕیاریداوه‌ له‌ماوه‌ی ١٩ ڕۆژی داهاتودا چاوه‌ڕێی گه‌ڕانه‌وه‌ی به‌رگریکاره‌ مه‌دریدیه‌که‌ بکات و به‌هیچ شێوه‌یه‌ک بڕیاری دوورخستنه‌وه‌یی نه‌داوه‌.