عەدنان عوسمان: گۆڕان و میدیاکەی لە پەیڕەوکردنی "سیاسەتی نەعامە" زیان دەکەن

عەدنان عوسمان: گۆڕان و میدیاکەی لە پەیڕەوکردنی "سیاسەتی نەعامە" زیان دەکەن

عەدنان عوسمان: گۆڕان و میدیاکەی لە پەیڕەوکردنی

خەڵک-

هەڵسوڕاوێکی  باڵای گۆڕان رەخنە لە راگەیاندنی بزوتنەوەکەی دەگرێت بەوەی بێدەنگیی لە پیشاندانی ناڕەزاییەکانی خەڵک کردووە و دەڵێت، نیگەرانم سەبارەت بە دورکەوتنەوەی بزوتنەوەکەم لە شاڕیی بەرگریکردنی سەرسەختانە لە مافی هاوڵاتیان و داخوازیە رەواکانیان.

عەدنان عوسمان، ھەڵسوڕاوی باڵای گۆڕان و پەرلەمانتاری پێشووی ئەو بزوتنەوەیە لە پەرلەمانی کوردستان، دەڵێت: "وەک میدیاکارێکی پێشوی بزوتنەوەکە، توشی سەرسوڕمان و حەپەسان هاتووم لە شێوازی مامەڵەی میدیای گۆڕان لە ئاست ئەو روداوانەی لە ناوچەکەدا روئەدات، جا لە روماڵ نەکردنی هەندێک هەواڵی حزبەکانەوە، تا پشتگوێ خستنی نارەزایەتیەکانی خەڵک و خۆپیشاندانەکان و قسەوباس لەو بارەوە."

ھەروەھا دەڵێت: "لە هەموشی سەرسوڕهێنەرتر، میدیای حزبەکەم کە خۆی بە پێشەنگی بەرگریکردن لە مافی ئازادیخوازان و چالاکوانانی مەدەنی ئەزانێت و ساڵانێک بە قەڵای قایمی ئەوان و سەنگەری هەموو چالاکوانێکی مەدەنی بوو، وە هەڵوێستەکانی جێگای سەربەرزی ئێمەو شانازی و بەرزنرخاندنی ئەوان بوو، ئێستا لە ئاست گرتن و رفاندنی هەندێک چالاکوان (جا هاوڕابین لەگەڵیان یا نە) ئاوا هەم وەک حزب بێدەنگە و فشارەکانی ناخاتە گەڕ بۆ کۆتایی هێنان بەو کردەوە نا شارستانی و نا دیموکراتیانە و هەمیش وەک کاری پیشەیی میدیایی روماڵی هەواڵەکانیان ناکات."

عەدنان عوسمان نیگەرانی خۆی لەو ھەڵوێستەی ئێستای میدیای بزوتنەوەکەی رادەگەیەنێت و دەڵەت: "سەرباری نیگەرانیم لەم هەنگاوە چاوەڕواننەکراوە، مەترسی باڵادەستی تێگەیشتنێکی موحافزکارانە دەکەم و دڵەراوکێی دورکەوتنەوەی بزوتنەوەکەمم لە شاڕێی بەرگریکردنی سەرسەختانە لە مافی هاوڵاتیان و داخوازیە رەواکانیان. بەرگری کردن لە مافی هاوڵاتیان و لەهەمان کاتیشدا رێگەگرتن لە توندوتیژی و شێواندنی رێڕەوی نارەزایەتیەکان."

لە کۆتاییدا ئاماژە بەوە دەکات: "دەکرێت لە رێگەی سیاسەتێکی واقعبینانە و روماڵێکی بابەتیانە و بەرپرسانەوە کاری لەسەر بکرێت، بۆ ئەوەی بە ئاراستەی مەدەنیانە و ئاشتیانەدا بڕوات، نەک فەرامۆش کردن و خۆ بەدورگرتن وشاردنەوەی. ئەو سیاسەتی نەعامەیە دواجار خودی بزوتنەوەکە و میدیاکارە سەر بڵندەکانی زەرەرمەندی دەبن، ناشکرێ تاسەر لە ئاستیدا بێدەنگ بین."

24/09/2016
2492 جار بینراوە‌‌