"لە ئاست ئەو زوڵم و ناحەقییەی دەكرێت وەزیرە ئیسلامییەكان بێدەنگن"

"لە ئاست ئەو زوڵم و ناحەقییەی دەكرێت وەزیرە ئیسلامییەكان بێدەنگن"


خەڵك-دڵشاد حەمە

ئەندامێكی پەرلەمانی كوردستان داوای هەڵوێست نواندن لە وەزیرە ئیسلامییەكانی نێو حكومەت دەكات و دەڵێت، وەزیرە ئیسلامییەكان لە ئاست ئەم ناحەقی و زوڵمەی لە فەرمانبەرانی كوردستان ئەكرێت، بێ دەنگییان هەڵبژاردووە و هەڵوێستیان نییە.

شوان قەڵادزەیی، سەرۆكی فراكسیۆنی بزوتنەوەی ئیسلامی لە پەرلەمانی كوردستان داوای هەڵوێست نواندن لە وەزیرە ئیسلامییەكانی نێو حكومەت دەكات و دەڵێت: "حكومەت لە (2016/6/9) كۆبۆوە، بەڵام سەرەڕای ئەوەی نرخی بەرمیلێك نەوت لە (28) دۆلارەوە گەیشتە (50) دۆلار، مەخابن، سزادانی فەرمانبەران كە بە پاشەكەوت ناوزەدیان كردووە وەكو خۆی مایەوە و هیچ گۆرانێك بەسەر موچەكانیاندا نەهات، ئەمە لەكاتێكدا حكومەت لەسەرەتاوە بەڵێنی بە فەرمانبەران دابوو بە پێی بەرزبوونەوەی نرخی پیترۆل مانگانە گۆران بەسەر موچە كانیاندا دیت."

شوان قەڵادزەیی ئەوەشی راگەیاندووە: "لە لایەكی تر جێی سەرنجە كە وەزیرە ئیسلامیەكان لە كۆبوونەوەكاندا بێ دەنگییان هەڵبژاردووە و لە ئاست ئەم ناحەقی و زوڵمەی لە فەرمانبەرانی كوردستان ئەكرێت هەڵوێستیان نییە، چونكە ناكرێت نرخی نەوت دو ئەوەندە بەرزبێتەوە بەڵام پاشەكەوت و سزادان بەردەوام بێت."

بەرامبەر وەزیرە ئیسلامییەكانیش دەڵێت: "خەڵكی كوردستان چاوەڕێ بوون لە ئێوەی وەزیر لەدوای كۆبوونەوەكەی حكومەت لەكۆنگرەیەكی رۆژنامەوانیدا هەڵوێستی خۆتان ڕابگەیەنن و دژی بەردەوامبوونی پەیڕەو كردنی سیاسەتی سزادانی فەرمانبەران و چەق بەستویی موچە نارەزایی خۆتان رابگەیەنن، بەدڵنیایی بێدەنگ بوون و خامۆشیتان رازی بوونە بەو زوڵمەی كە لە هاوڵاتیانی كوردستان ئەكرێت، بەتایبەت كار بەوە گەیشتووە كەسوكاری سەربەرزی شەهیدان و ئەنفالكراوان و خانەنشینانی سەربازی و شارستانی بە دوو مانگ جارێك موچەیان پێدەدرێت."

ئاماژەی بەوەشكردووەو: "جێی خۆیەتی هەڵویستی مەردانە و مێژوییتان هەبێت و پشتگیری فەرمانبەران و جەماوەری كوردستان بكەن و هەرەشەی كشانەوە لەم حكومەتە قەیراناویە بكەن، ئەگەر لە ماوەیەكی دیاری كراودا كۆتایی بە سیاسەتی پاشەكەوت كردن نەهێنێت."

10/06/2016
1477 جار بینراوە‌‌