بەهۆی قەیرانی دارایەوە هەڵكەندنی خەندەقەكە ڕاگیراوە

بەهۆی قەیرانی دارایەوە هەڵكەندنی خەندەقەكە ڕاگیراوە

بەهۆی قەیرانی دارایەوە هەڵكەندنی خەندەقەكە ڕاگیراوە


خەڵك- بەشی هەواڵ

پـرۆسەی هەڵكەندنی خەندەق لە نێوان هەرێمی كوردستان و ناوچەكانی ژێر دەسەڵاتی داعش و حەشدی شەعبی ڕاگیراوە و بەشێك لە فەرماندەكانی پێشمەرگەش هۆكارەكەی بۆ قەیرانی دارایی دەگێڕنەوە.

عەقید جمور ڕۆستەم، فەرماندەی پێشمەرگە لە پارێزگای دیالە، ئاماژەی بەوەكرد لە جەلەولاوە بۆ ناوچەی كۆباشی باشوری خانەقین بە درێژایی 11 كیلۆمەتر خەندەقیان هەڵكەندووە، بڕیاربووە خەندەقەكە هەتا ناوچەی نەفتخانە لە نزیك قەزای مەندەلی بڕوات، بەڵام هەڵكەندنی خەندەق ڕاگیرا.

لە هەندێك ناوچە بە تایبەت باشور و ڕۆژئاوای كەركوك پرۆسەی هەڵكەندنی خەندەق تەواو بووە و دەوروبەری خەندەقەكان تەلبەند و مین ڕێژیش كراون.

عەبدوڵا بۆر، فەرماندەی میحوەری پارێزگای سەڵاحەدینی پـێشمەرگە، بە دەنگی ئەمەریكای راگەیاندوە، لە سنووری قەزای خورماتووش هەڵكەندنی خەندەق راگیراوە و هۆكاری ڕاگرتنەكەش لای وەزارەتی پێشمەرگەیە.

بەڵام محەمەد فایەق، بەرپرسی راگەیاندنی قایمقامیەتی خورماتوو، هۆكاری راگرتنی خەندەقی لەسنوری خورماتوو لەلایەن پێشمەرگەوە بۆ قەیرانی دارایی گێرایەوە.

هەڵكەندنی خەندەق كە ساڵی پار لەلایەن هەرێمەوە دەستیپێكرا، بریاربوو بەدرێژایی 1050 كیلۆمەتر و لەموسڵەوە هەتا خانەقین خەندەق بەدەوری هەرێم دا لێبدرێت، ئەمەش نیگەرانی لای حكومەتی عێراق دروستكرد بەوەی هەوڵێكە بۆ دیاریكردنی سنوری كوردستان.

10/06/2016
1021 جار بینراوە‌‌